Kartellet tar leik og folkedans til Tromsø-skulane

Det blir garantert ville bilete og mykje latter når dansekompaniet Kartellet møter over 1000 fjerdeklassingar i Tromsø 6.–8. oktober. På Tromsø Kulturhus spelar dei framsyninga An dran drin drekt – ei forestilling som byr på felespel på stylter, krumspring, folkedans og rare regler.

An dran drin drekt har vore vist meir enn 200 gonger, mellom anna på Moldejazz, Rockheim, Festspillene i Bergen og Festspillene i Nord-Norge. No kjem framsyninga heim til Tromsø med ei blanding av fotball, stylter, leik og folkemusikk.

– Vi vil dele med verda at den rare, artige leiken er gull verdt, seier Kartellet-sjef, Sigurd Heide.

Den rytmiske regla som har gitt namn til framsyninga er kjent frå Grytøya og Vesterålen:

«An dran drin drekt. Kontra både fem og seks. Bom bam dutri dam. Silkemaga, buldrikaka. Ditt om. Pøk utav.»

Som ein fun fact kan Heide fortelja at førestillinga har vore ute i hardt vêr, bokstaveleg talt.

- Førestillinga har vore spelt i stiv kuling og 13 minus, og 33 varmegrader som kontrastar. Fungerer både vinter og sommar.

Kartellet håpar å inspirere barn og vaksne til å leike meir i kvardagen – og kanskje til og med danse.

Medverkande:

• Jo Einar Sterten Jansen (Målselv) – stylter og fele
• Sigurd Johan Heide (Grytøy/Tromsø) – krumspring og dans
• Tone Ingvaldsen (Bodø/Målselv) – reglar og dans

Framsyninga er coprodusert av Festspillene i Nord-Norge og støtta av Norsk Kulturfond.