Folkemusikk 4/2025

Neste nummer av Folkemusikk er like om hjørnet, så det er ikkje lenge før abonnentar kan ta seg ein målretta tur bort i postkassa. Les meir om innhaldet i Folkemusikk 4/2025 her. Her finn du også informasjon om korleis du kan få kjøpt dette nummeret i laussal og/eller bli fast abonnent av magasinet.

Ikkje abonnent? Ting abonnement her

Du kan tinge abonnement av Folkemusikk her. Lenke til et annet nettsted.

Tidlegare utgåver av Folkemusikk kan kjøpast på Tekstallmenningen. Lenke til et annet nettsted.

Innhald Folkemusikk 4/2025

Spelemannen Håkon Høgemo er 60 i år. I eit møte med tidlegare elev Johanne Flottorp fortel han om ideala sine som både spelemann og pedagog. Ein annan jubilant er den nordnorske suksesshistoria Hekla Stålstrenga, som i år feirar 20 år med ein ny plateproduksjon, og du møter gjengen i dette nummeret. Du møter elles i dette nummeret både Sigurd Heide, Gunnlaug Lien Myhr, Magnhild Garnås Haugen, Gaute Hadland og Jon Faukstad. Me møter også tre av dei første bachelorstudentane i folkedans i Rauland, som er storvegs nøgde med opplegget så langt.

Det har elles vore ein travel haust i folkemusikklandskapet. Redaktøren har vore ein tur på Osafestivalen, noko som resulterte i eit reisebrev. Tidlegare redaktør Jostein Aardal har besøkt Hilmarfestivalen, og i tillegg blir det ein rapport frå Are August Flanagan Furebotn sin tur til Irland no i sumar. Me får også gjere ein tur innom tre minnekonsertar og to Noregspremierar blant mykje anna.

I samband med utvandrarjubileet i år har Hans-Hinrich Thedens skrive ein omfattande artikkel om den kjende norsk-amerikanske spelemannen Eivind D. Aakhus. Samtidig får me eit minneportrett av 100-årsjubilanten Embrik Bergaplass ført i pennen av Anders Lunden Herfoss. Bjørn Aksdal kom i år med ei bok om felemakaren som vart udødeleggjort i Edvard Hoem sin roman med same tittel – Lars Olsen Hoem.

Det blir også i dette nummeret rikhaldige platemeldingar frå eit breitt spekter av meldarar i magasinet sitt meldepanel. Og i dette nummeret får lesarane møte personane bak to av selskapa som står bak mange av årets produksjonar.

Som ein bonus til årets siste nummer har grafikar Margit Rønning Omholt fått i oppgåve å illustrere ei god, gamal Jørgen Tjønnstaul-rispe.