Folkemusikken pregar fleire kategoriar på Spellemann

I dag blei dei nominerte til Spellemann 2025 offentleggjorde. I klassa for tradisjonsmusikk finn me fire varierte plater frå musikkåret som gjekk. Men også i andre kategoriar var folkemusikken sterkt representert.

Tekst: Redaksjonen

Tidlegare denne veka blei det kjend at NRK igjen skal sende Spellemann på TV, etter fleire år der utdelinga har blitt sendt på andre flater.

Utdelinga i år skjer på Den norske opera og ballett i Oslo søndag 22. mars. Det var også på Operaen at dei nominerte blei avslørt på ein pressekonferanse i dag.

I klassa for tradisjonsmusikk er desse fire nominerte:

Hekate – Evigheten forestår

Malmin med Åshild Vetrhus

Kenneth Lien & Center of the Universe – Norwegian Electronic Folk Music

Qvam/Plassen – Stråk

Men folkemusikken er også godt representert i andre sjangar.

Valkyrien Allstars er nominert i kategorien Vise for albumet Vente på noen som venter på noen. Dette albumet fekk dei Folkelarmprisen i Åpen klasse for i november.

Benedicte Maurseth er nominert til Tonos komponistpris. Ho er også nominert i Åpen klasse for albumet Mirra. Der har ho selskap av Ævestaden med albumet Ni blomster i en åker, og Erlend Apneseth med albumet Song over støv.

Felespelar Olav Mjelvas folkmetalprosjekt Afargang, med albumet Andvake, er nominert i kategorien Hardrock og metal. I 2009 fekk han Spellemann i kategorien Folkemusikk.

Folkemusikaren Eilif Gundersen er også nominert saman med bandet Wardruna til årets internasjonale suksess.