Vil utfordre kappleiken – inviterer til seminarhelg med debatt og dommarkurs

Korleis dømmer ein eit repertoar i endring? Korleis byggjer ein trygge, inkluderande miljø i folkemusikken? 7.–8. mars inviterer FolkOrg til seminarhelg på Riksscenen, med debatt, dommarkurs og sosial dansehelg for heile folkemusikkfeltet.

Tekst: Redaksjonen

– Denne seminarhelga er for alle som er glade i tevling på kappleik og festival, seier Ingeborg Ulberg Sommer og Liv Annette Nygjerdet som jobbar i FolkOrg-administrasjonen.

Dei understrekar at ein ikkje treng å definere seg som dommar for å delta.

Finn meir informasjon om seminarhelga på FolkOrg sine sider. Lenke til et annet nettsted, åpnes i nytt vindu.

– Mange kan vere nysgjerrige på korleis dommarane arbeider, utan at dei nødvendigvis har planar om å dømme sjølve. Her får ein høve til å teste om dommargjerninga er noko ein kan trivast med. Det er viktig å presisere at dommarseminaret ikkje er ei sertifisering, men eit rom for fagleg påfyll og refleksjon.

 Overordna tema for dommarseminaret er repertoar. Spørsmålet som opnar heile helga er spissa formulert: «Er tevlingssituasjonen for konservativ?»

– Repertoar er alltid aktuelt. Mange har sterke meiningar om kva som høyrer heime på kappleiksscena. Vi ønskjer å setje ord på desse diskusjonane og invitere til open samtale om både tradisjon og utvikling, seier dei.

Fagleg fordjuping i spel, dans og vokal

Seminarprogrammet gir deltakarane moglegheit til å fordjupe seg i eigne fagområde. I spel møter ein Sivert Holmen og Rikke van Ommeren, i dans Mette Vårdal og Ellen Persvold, og i vokal Berit Opheim.

 – Her går vi djupare inn i problemstillingar knytte til dømming innan dei ulike uttrykka. Det blir både faglege innlegg, diskusjonar og prøvedømming, fortel Sommer og Nygjerdet.

Prøvedømminga har vore spesielt etterspurd ved tidlegare seminar.

– Det å få øve seg og diskutere vurderingar i fellesskap gjer at fleire kjenner seg tryggare i rolla.

Satsing på ungdommar og levande møteplassar

Parallelt med dommarseminaret blir det arrangert eige kurs i organisasjonsarbeid for ungdom.

– Barn og unge er ei veksande medlemsgruppe i organisasjonen. Ved årsskiftet hadde vi over 1100 medlemmar under 26 år. Då er det naturleg at dei også får høve til å påverke retninga vidare, seier dei.

Satsinga handlar både om representasjon og framtidig rekruttering.

– Når ungdom får ansvar og reell påverknad, styrkjer det eigarskapen og engasjementet.

På programmet står også tryggleik, samhald og inkludering, i samarbeid med Balansekunst.

– Det musikalske står sjølvsagt sterkt, men miljøet rundt er minst like viktig. Vi ønskjer eit folkemusikkmiljø som er trygt og inkluderande på tvers av generasjonar.

 At seminarhelga er lagt til Riksscenen, med konsertar, plateslepp og dansefest som del av ramma, ser dei som ein styrke.

– Det faglege og det sosiale heng saman. Vi håpar folk frå heile landet tek turen, både for å diskutere, lære og for å oppleve god musikk og danse i lag.