Statens kunstnarstipend til fleire folkemusikarar

I dag blei tildelingane frå Statens kunstnarstipend offentleggjort, og nålauget for å få arbeidsstipend har aldri vore trongare. Fleire av dei som har nådd opp via den rekordstore søknadsbunken, tilhøyrer folkemusikk- og folkedansfeltet.

Tekst: Redaksjonen

Det er i år eit rekordstort tal på søkjarar, noko som vitnar om høg kunstnarisk aktivitet og kvalitet i Noreg, skriv Kulturdirektoratet i ei pressemelding.

I år søkte 5459 kunstnarar med til saman 12936 søknadar. Søknadene har blitt vurdert av 20 stipendkomitear.

– Dei gjer tøffe vurderingar og prioriteringar. Svært mange kvalifiserte søkjarar får dessverre avslag, seier Trude Gomnæs Ugelstad, som er utvalsleiar for Statens kunstnarstipend.

Ho seier at stipendordningane er eit av dei beste verkemidla for å uvikle kustnarmiljø over heile landet, og at ei styrking av kunstnarstipenda framover derfor er avgjerande.

Det er i kategorien arbeidsstipend at det kjem inn flest søknadar. I år kom det inn 4504 søkndadar til dette, og av desse var det 237 som fekk søknaden sin innvilga.

Blant desse finn me under kategorien folkekunstnarar musikarane Thomas Eriksson, Olav Luksengård Mjelva, Per Anders Buen Garnås og Camilla Granlien. Dei får alle arbeidsstipend i eitt år. Instrumentmakar Karstein Grønnesby, som det står reportasje om i Folkemusikk 1/2026, har også blitt tildelt dette stipendet for eitt år.

Andre som har fått arbeidsstipend i andre kategoriar, er Gjermund Larsen (musikarar, songarar og dirigentar) og Karl Seglem og Tone Hulbækmo (begge populærkomponistar). Larsen får arbeidsstipend i tre år, Seglem i to år og Hulbækmo i eitt år.

Blant dei som har fått arbeidsstipend for yngre og nyetablerte kunstnarar, er hardingfelespelaren Sindre Tronrud. Han får stipend i eitt år.

I tillegg til arbeidsstipenda, blir det også delt ut mange såkalla diversestipend. Der arbeidsstipenda blir utbeltalte med ein fast sum kvar månad, er diversestipenda ein eingongssum, der summane varierer frå 15.000 til 100.000.

I kategorien for folkekunstnarar har Lars Erik Øygarden, Ingrid Standal Sørheim, Ingebjørg Lognvik Reinholdt, Marja Mortensson og Ottar Kåsa alle fått diversestipend.

Felemakar Jakob Reuben Fineberg (folkekunstnar, yngre/nyetablerte) får stipend i eitt år, medan Levina Storåkern får stipend som populærkomponist (også i yngre/nyetablerte kunstnarar).

Felespelar Nina Fjeldet har fått diversestipend, i kategorien for musikarar, songarar og dirigentar.

På lista over tildelingar av diversestipend for nyutdanna kunstnarar står dansar og koreograf Vetle Springgard og folkesongar Martin Steinum Brun.