Blømingsfestivalen med rekordpåmelding

Til helga samlast kring 30 gamaldansorkester på Blømingsfestivalen i Kinsarvik. Med rekordstor deltaking, sterk juniorrekruttering og finale i gruppespel ligg alt til rette for ei tettpakka festivalhelg.

Tekst: Kjellbjørn Karsrud

Blømingsfestivalen blir arrangert på Mikkelparken ferietun i Kinsarvik, og har sidan oppstarten i 1990 utvikla seg til å bli ein sentral møteplass for gamaldansmiljøet på Vestlandet.

– Me er Vestlandets største gamaldansfestival, seier Alexander Røynstrand, som sit i arrangementskomiteen saman med Ole Gjerde.

I år er det meldt på om lag 30 orkester – det høgaste talet sidan Røynstrand byrja som arrangør for rundt ti år sidan.

Tevling og dans

Festivalen er bygd opp kring éi hovudtevling: gruppespel, der Vestlandets beste gamaldansorkester blir kåra.

– Mange av gruppene som kjem, spelar også til dans fredag og laurdag kveld, fortel Røynstrand.

Fredagskvelden byr på dans og sosialt samvær, medan sjølve tevlinga går føre seg i salen på campingområdet på dagtid før finalen. Fem grupper går vidare til finale laurdag kveld.

I tillegg blir det sett av tid til barn og unge:

– Me har ein eigen time med litt ekstra fokus på dei yngste deltakarane, seier han.

Sterk deltaking frå heile Vestlandet

Deltakarane kjem hovudsakleg frå Hordaland og Sogn og Fjordane, og spennet er stort – frå toradarlag til spelemannslag med feler.

Hafslobelgen, fjorårets vinnarar av Landsfestivalen, blir også å høyre i Kinsarvik:

Blant dei påmelde i år er fleire sterke namn, mellom andre Hafslobelgen, som vann Landsfestivalen i fjor, og tidlegare finalistar som Sindre & co, Hardanger spelemannslag og Vossakrutt.

– Det er veldig gledeleg at det er med heile ti juniorgrupper, seier Røynstrand.

Eit av tiltaka som har vekt merksemd dei siste åra, er forsøket på å samle deltakarane til eit stort fellesorkester.

– I fjor prøvde me å stelle til Vestlandets største gamaldansorkester. Då plukkar me ut nokre låttar og samlar alle som vil vere med til ei felles økt, fortel han.

Også i år ligg det an til mykje spel og dans gjennom heile helga, med alle arrangement samla på festivalområdet ved Mikkelparken.

Arrangør på scena

Årets dommarpanel består av Arne Anderdal, Irene Tillung og Siren Thorsheim.

Røynstrand skal også sjølv i aksjon som utøvar i løpet av helga, både med Hardanger spelemannslag og gruppa Humlepung.

– Det er ei miksa gruppe som oppstod spontant i fjor, med Arve Bjørn Røneid, Asbjørn Røneid og Ole Gjerde – og ein gitarist om me finn ein, seier han.

For meir informasjon om programmet, sjå festivalen sine Facebook-sider. Lenke til et annet nettsted, åpnes i nytt vindu.