Vårens eksamenskonsertar står for døra

Juni er eksamenstid ved dei høgare folkemusikkutdanningane, og dei komande dagane blir det høve til å oppleve eit breitt spekter av unge utøvarar innan folkemusikk og folkedans. Ved både Ole Bull Akademiet, Noregs musikkhøgskole og Universitetet i Sørøst-Norge inviterer studentane til eksamenskonsertar, framsyningar og avsluttande prosjekt.

Tekst: Pressemelding/redaksjonen

Ved Ole Bull Akademiet går vårens eksamenskonsertar føre seg 10. og 11. juni. Studentane presenterer både kortare eksamenar i Dansestova og større avsluttande konsertar i Osasalen.

Onsdag 10. juni byrjar programmet i Dansestova med Iselin Aukrust (fele/vokal) kl. 10.00, etterfølgt av Lovise Espeland (vokal) kl. 11.00, Hanne Kjøk (fele/vokal) kl. 11.40 og Lina Brenden (fele) kl. 13.00. I Osasalen held Silja Lid Strysse (toradar) konsert kl. 18.45, før Emma Sandseter-Selen (trekkspel) går på scena kl. 20.00.

Torsdag 11. juni held Semon Harerusten (gitar/cittern) eksamenskonsert kl. 13.00 og Ivar Blekastad Haugen (trekkspel) kl. 14.00 i Dansestova. Om kvelden blir det konsertar i Osasalen med Synne Kjøk (fele) kl. 17.30, Ane Stakston Aasen (fele) kl. 18.45 og Solveig Eide Grønningsæter (fele) kl. 20.00.

Konsertane i Dansestova varer om lag 20–25 minutt, medan konsertane i Osasalen varer rundt 45 minutt. Det er gratis inngang til alle arrangementa.

Improvisasjon, tradisjon og nyskriven musikk ved NMH

Ved Noregs musikkhøgskole blir det fleire folkemusikkrelaterte eksamenskonsertar i Lindemansalen fredag 5. juni.

Kl. 15.50 held Sunniva Langås-Røiland bachelorkonsert. Ho tek publikum med på ei musikalsk reise gjennom slåttetradisjonar frå fleire delar av landet, både på hardingfele og fele, solo og i samspel med medstudentar.

Kl. 16.40 følgjer Åsmund Arnesen Farstad sin avsluttande bachelorkonsert «Sluttspel». Farstad, som kjem frå Volda, set tradisjonsmusikk frå Sunnmøre og Nordfjord i møte med nyare komposisjonar og eigne arrangement, med særleg vekt på samspelet mellom improvisasjon og tradisjon.

Kl. 18.00 presenterer Jon Hjellum Brodal masterprosjektet sitt. Gjennom to år har han utforska ulike former for slåtteimprovisasjon på hardingfele i samspel med elektronisk bearbeidd lyd frå instrumentet. Konserten kombinerer hardingfele, live looping og ensemble med kontrabass, perkusjon, klarinett og strykarar.

Laurdag 6. juni kl. 17.10 held folkesongaren Runa Kvalsund sin avsluttande bachelorkonsert «Lært av mor» i Levinsalen. Her utforskar ho korleis tradisjonsmusikk blir overført mellom generasjonar, med utgangspunkt i materiale frå Sør-Trøndelag og Nordmøre, kombinert med eigne songar. Med seg har ho mellom anna medlemmar frå vokalkvartetten Munnleg og bandet Sluppen Grafokordlag.

Alle konsertane ved Noregs musikkhøgskole har gratis inngang.

Sjå meir informasjon her. Lenke til et annet nettsted.

Vårslepp i Rauland

Ved Institutt for tradisjonskunst og folkemusikk i Rauland blir studieåret avrunda med Vårslepp 2026.

Fredag 5. juni opnar studentutstillinga i hovudbygget kl. 18.00. Seinare på kvelden, kl. 20.00, blir det konsert med The Nordic Fiddlers Bloc.

Laurdag 6. juni er utstillingane opne frå kl. 13.00 til 16.00. Kl. 16.00 inviterer studentane til Vårslepp-framsyninga, ei scenisk førestilling med levande musikk og dans.

I tillegg blir årets mastereksamenar ved instituttet gjennomførte måndag 8. juni.

Mange unge utøvarar på veg ut i folkemusikkfeltet

Til saman gir vårens eksamenskonsertar eit innblikk i breidda ved dei norske folkemusikkutdanningane. Publikum får møte både tradisjonsberarar, komponistar, improvisatørar, songarar og instrumentalistar som står på terskelen til eit yrkesliv i folkemusikken.

For dei som ønskjer å få med seg kva som rører seg blant den oppveksande generasjonen folkemusikarar, ligg det dermed godt til rette for fleire konsertopplevingar dei komande dagane.