Inviterer til Huldernatt på Brimi Sæter

I sommar inviterer tre unge folkemusikarar publikum med inn i huldra si verd på Brimi Sæter i Vågå. Gjennom den nyskapte førestillinga Huldernatt vil dei formidle lokal folkemusikk, historier og tradisjonar knytte til sæterlivet og dei underjordiske.

Tekst: Pressemelding/redaksjonen

Førestillinga blir sett opp på Brimi Sæter 14 kveldar gjennom sommaren, og er utvikla av studentane Lina Brenden, Hanne Kjøk og Synne Kjøk, som alle studerer utøvande tradisjonsmusikk ved Ole Bull Akademiet på Voss.

– Vi meiner at folk bør oppleve folkemusikk sett i sitt rette element, med omgjevnader som har påverka musikken. Vi ønskjer å skape sterke kulturelle opplevingar både for dei som kjenner folkemusikken godt og for dei som møter han for første gong, seier Lina Brenden.

Huldra i sentrum

Den musikalske førestillinga har huldra som gjennomgåande tema. Gjennom song, fele, trekkspel og dans tek dei tre aktørane publikum med inn i forteljingar om sæterliv, budeier og folketru.

Førestillinga blir framført utandørs i dei seine sommarkveldane på sætra, der musikken og historiene blir presenterte i det landskapet dei har vakse fram frå. Dei tre musikarane opptrer utkledde som huldrer, med rondastakk, lange fletter og hale.

– Gjennom arbeidet med prosjektet har vi gått i djupna på musikk og forteljingar kring huldra og sæterlivet. Dette er eit tema som også opptek Hans W. Brimi sine komposisjonar og interesser, noko vi har funne svært inspirerande, fortel Brenden.

Hans W. Brimi som inspirasjonskjelde

Ein viktig del av repertoaret er musikk etter Hans W. Brimi, bestefaren til dagens sætereigar Hans Brimi. Fleire av slåttane hans vart til nettopp på Brimi Sæter, og musikken står sentralt i førestillinga.

I tillegg er repertoaret henta frå lokale kjelder og tradisjonar som byggjer opp under forteljinga om huldra og livet på setra.

Bakgrunnen for prosjektet er eit ønskje om å utvide kulturtilbodet ved Brimi Sæter. Samstundes har dei tre musikarane vilja løfte fram den lokale tradisjonsmusikken og setje han inn i ein historisk og kulturell samanheng.

Del av sommarkvelden på sætra

Huldernatt blir spela etter matopplevinga «Skråpå-tå» på Brimi Sæter, men førestillinga er open for alle interesserte. Arrangørane håpar kombinasjonen av lokalmat, kulturlandskap og levande tradisjonsmusikk skal gi publikum ei heilskapleg oppleving av staden og historia.

Billettar kan kjøpast via Brimi Sæter sine nettsider. Lenke til et annet nettsted, åpnes i nytt vindu.