Desse kan vente seg stønadsauke om SP får vilja si

Sju nasjonale organisasjonar på folkemusikkfeltet får til saman 3,5 millionar i auke i Senterpartiet sitt alternative budsjettforslag.

Tekst: Pressemelding/redaksjonen

I sitt alternative statsbudsjett for 2026 legg Senterpartiet fram eit breitt kulturarvløft der folkedans, folkemusikk og immateriell kulturarv står sentralt. Til saman får sju nasjonale organisasjonar innan folkemusikk- og folkedansfeltet 3,5 millionar kroner i auka driftsstøtte.

– Folkemusikken og folkedansen er ikkje berre tradisjon – dei er levande uttrykk som samlar folk, byggjer identitet og skapar fellesskap på tvers av generasjonar. Difor styrkjer vi dei miljøa som held dette i hevd, seier Senterpartiets kulturpolitiske talsperson Erling Sande.

Den samla satsinga er del av eit større kulturarvløft på 62,3 millionar kroner, som omfattar både organisasjonar, institusjonar og handverksmiljø over heile landet. I tillegg føreslår Senterpartiet å flytte heile kulturmiljøfeltet frå Klima- og miljødepartementet til Kulturdepartementet, slik at kulturarven blir ein integrert del av kulturpolitikken.

– I dag ligg mykje av ansvaret for kulturarven i miljøforvaltninga. Det gjer at dei levande uttrykka – dansen, musikken, handverket – ofte kjem i skuggen av mur og stein. Vi vil samle kulturarven der han høyrer heime: i Kulturdepartementet, seier Sande.

Sande peikar på at folkemusikk- og folkedansorganisasjonane gjer ein avgjerande innsats for rekruttering, opplæring og formidling:

– Frå kappleikar, kurs og øvingar i leikarringar, ungdomslag og spelemannslag – dette er miljø som byggjer både kultur og lokalsamfunn. Med denne auken i støtta gir vi dei betre rammer til å halde fram med det livsviktige arbeidet sitt.

Også kystkulturen, fartøyvernet og tradisjonshandverket er ein del av kulturarvløftet, som skal løfte fram breidda i norsk kulturarv og sikre betre samarbeid mellom frivilligheita, musea og dei offentlege institusjonane.

– Kulturarvpolitikken handlar om røtene våre – og om dei som held liv i dei. Frå slåttespel og bunadssaum til båtbygging og dans på lokalet – alt dette er delar av same livsnerve. Den må få meir plass i framtidas kulturpolitikk, seier Sande.

Heile budsjettet kan ein finne her. Lenke til et annet nettsted.