Dans, dans, dans: Revitalisering av dans i samisk, kvensk og skogfinsk kultur

Norsk senter for folkemusikk og folkedans inviterer til ein heil fag- og forskingsdag på Riksscenen i Oslo 29. januar. I samband med folkedansfestivalen Dans, dans, dans blir det seminar om samiske og nasjonale minoritetstradisjonar, etterfølgt av verkstad om nye ressurshefte for kulturskulane. Arrangementet er gratis og ope for alle interesserte.

Tekst: Pressmelding/redaksjonen

I samband med folkedansfestivalen Dans, dans, dans opnar Norsk senter for folkemusikk og folkedans (Sff) dørene for ein heil dag med fagleg fordjuping, praktisk dans og utviklingsarbeid. Seminaret finn stad på Riksscenen i Oslo torsdag 29. januar, og samlar både utøvarar, pedagogar, forskarar og danseinteresserte.

Første del av dagen er vigd dansetradisjonar i samisk, kvensk og skogfinsk kultur, med utgangspunkt i Sff sitt omfattande filmarkiv og pågåande fagarbeid. Her får deltakarane sjå filmopptak, drøfte fellestrekk mellom tradisjonane – og ikkje minst prøve dansane ute på golvet.

Sff samarbeider i arbeidet med sterke fagmiljø, mellom anna Karhutanssi Dance Company, Skogfinsk forening og prosjektet Sørsamisk musikk- og dansetradisjonar, i samarbeid med Saemien Sijte og HATS ved Ung Samisk Scene.

På programmet står innlegg frå fleire markante aktørar:
Sigurd Johan Heide (Kartellet) tek for seg dansetradisjonar i Nord-Noreg, Astrid Serine Hoel frå Karhutanssi Dance Company presenterer kvenske dansar, medan Ada Einmo Jørgensen frå Ada-Da produksjonar løftar fram samisk scenekunst. Vidare kjem Anna Kråik med sørsamisk sydisdans, og Vegar Vårdal deler skogfinske dansetradisjonar.

Etter lunsj inviterer Sff til ein kreativ verkstad der deltakarane får vere med på å forme innhald til nye ressurshefte for folkemusikk og folkedans, knytte til den nye rammeplanen for kulturskulane. Her blir det gruppearbeid og idéutvikling, med bidrag frå styreleiar i Kulturskolerådet Innlandet, Jertru Torsdatter Stallvik, som gir innsikt i rammeplanen og moglegheitene ho opnar for.

Seminaret er lagt opp slik at ein både kan delta aktivt på golvet, eller lytte, sjå film og ta del i samtalane. Det blir også gjort videoopptak som seinare går inn i Sff sitt fagarkiv og blir brukt i vidare fagutvikling.

Kvelden held fram i dansens teikn: Klokka 20.00 blir det kræsjkurs i sydisdans med Anna Kråik, før det seinare på kvelden blir levande musikk og sosial dans på Riksscenen, i samarbeid med Samisk hus i Oslo.

Fag- og forskingsdagen er ein del av folkedansfestivalen Dans, dans, dans, som går føre seg over fleire dagar i hovudstaden.