Kong Lavring trio til Sagene Kunstsmie

Middelalderballadar, gamle folkeinstrument og fleirstemt song står i sentrum når Kong Lavring trio med Eli Storbekken, Espen Wensaas og Jørn Jensen kjem til Sagene Kunstsmie i kveld.

Tekst: Pressemelding/redaksjonen.

Torsdag 6. februar klokka 19.00 blir det historisk sus og klangrik forteljarkunst på Sagene Kunstsmie i Oslo når Kong Lavring trio inviterer til konsert. Med seg har dei eit mangfald av eldre folkeinstrument, fleirstemt koring og songar som har levd i tradisjonen i fleire hundre år.

Kong Lavring III tek utgangspunkt i middelalderballadane som det legendariske folkrockbandet Kong Lavring arbeidde med på 1970-talet. No har trioen lagt vekk folkrock-uttrykket og satsar på eit reint akustisk format, der dei episke visene får stå i sentrum med nære arrangement og historisk klangbotn.

I trioen finn vi
Jørn Jensen på dulcimer, krumhorn, mandola, dulcian, munnharpe og song,
Espen Wensaas på concertina, cittern, bukkehorn og song,
og Eli Storbekken på song og seljefløyte.

Publikum får høyre både balladar, instrumentalmelodiar, tralling og dansetypar som shottis, halling og pols. Instrumenteringa spenner frå eldre blåseinstrument til eit mangfaldig utval streng- og rytmeinstrument, og konserten er bygd opp rundt forteljing, klang og fleirstemt song.

Kong Lavring har røter attende til 1974, då Jørn Jensen var med og starta folkrockbandet med same namn, inspirert av grupper som Fairport Convention og Steeleye Span. Dette arbeidet munna ut i plata Kong Lavring i 1977, som fekk ein sentral plass i norsk folkrockhistorie.

I oktober 2024, 50 år etter oppstarten, stod ein ny versjon av bandet på scena på Riksscenen i Oslo under namnet Kong Lavring III. No kjem trioformatet til Sagene Kunstsmie for å vidareføre materialet i ei meir intim og akustisk drakt.