15 utøvarar klare for finalespel

Det har vore ein lang dag med tevling i Vågå i dag. Hovudsakleg i soloklasser med durspel, fele/hardingfele og trekkspel i tillegg til pardans. I kveld blir det fleire timar med finalespel når 15 utøvarar frå soloklassene skal til dyst.

Tekst: Kjellbjørn Karsrud.

Alle foto: Thomas Westling.

29 utøvarar hadde gjort seg klare til tevling då durspelklassa opna klokka 9.30 i dag tidleg.

Durspelklassa samla 29 deltakarar, med eit tydeleg tyngdepunkt i Gudbrandsdalen. Heile 14 utøvarar representerte lag frå Gudbrandsdalen – Lom, Vågå, Mukampen og Vardkampen – medan Valdres (inkludert Etnedal) stilte med to. Buskerud var representert gjennom Tradisjonslaget i Kongsberg Trekkspillklubb og Buskerud Folkemusikklag, medan Vestlandet stilte med utøvarar frå Osterøy, Jostedal og Naustedalen. I tillegg kom deltakarar frå mellom anna Oppdal og Gamlebanken Spelemannslag.

Seks utøvarar tok seg til finalen: Rikke van Ommeren (Oppdal Spell- og dansarlag), Even Offerdal Bakken (Lom Spel- og dansarlag), Jørn Kjetil Solbakken (Vågå Trekkspelklubb), Silja Lid Strysse (Tradisjonslaget i Kongsberg Trekkspillklubb) og Simen Fjeldberg Håland (Mukampen spel- og dansarlag).

Kjønnsfordelinga var framleis mannsdominert, men noko jamnare enn i fleire andre instrumentklassar. Av dei 29 deltakarane var åtte kvinner og 21 menn. To av dei fem finalistane er kvinner – Rikke van Ommeren og Silja Lid Strysse.

Resultatlista stadfestar samstundes at Gudbrandsdalen framleis står svært sterkt i durspelmiljøet. Lom hadde heile fem deltakarar, Vågå fire og Mukampen to – og alle tre miljøa fekk utøvarar til finalen. Samstundes viser finalefeltet at sterke durspeltradisjonar også finst i Trøndelag, Buskerud og andre delar av landet.

Høgt nivå i klassa for fele og hardingfele

Seniorklassa for fele og hardingfele på Landsfestivalen samla 24 utøvarar frå eit breitt spekter av tradisjonsmiljø over heile landet. Gudbrandsdalen var det tydelegaste tyngdepunktet, men finalefeltet viste at sterke spelemannsmiljø finst i mange delar av landet.

Vågå, Lom, Mukampen og Sør-Fron stod samla for sju av deltakarane i klassa, og gudbrandsdølane markerte seg også på resultatlista. Leif Inge Schjølberg frå Vågå spel og dansarlag tok seg til finalen, medan Vegar Vårdal frå Lom og Ola Kjorstad frå Sør-Fron enda på høvesvis sjette- og sjuandeplass. Vågå hadde også fleire sterke plasseringar med Ragna Valde Sletten og Eirik Schjølberg inne blant dei ti beste.

Finalefeltet på fem utøvarar spegla likevel den geografiske breidda i klassa. Britt Elise Skram frå Spelemannslaget Dåm og Drag, Marius Westling frå Østerdølenes Spellmannslag/Heidr spellmannslag, Ole Erik Feragen frå Brekken Spell- og Danselag, Hans Sandum frå Mukampen spel- og dansarlag og Leif Inge Schjølberg frå Vågå spel og dansarlag kjem frå ulike tradisjonsområde og representerer fleire av dei sterke felemiljøa i landet.

Kjønnsfordelinga var relativt jamn samanlikna med mange andre seniorklasser. Av dei 24 deltakarane var 10 kvinner og 14 menn, noko som gir ein kvinneandel på 41,7 prosent. I finalen var det éi kvinne og fire menn, med Britt Elise Skram som den kvinnelege finalisten.

Samla sett viser seniorklassa for fele og hardingfele eit breitt og sterkt miljø. Men enkelte tradisjonsområde glimrar med fråværet sitt. Blant anna stilte ingen valdrisar, hallingar, numedølar eller telemarkingar, sjølv om det finst rike runddanstradisjonar også i desse distrikta. Det viser at ein har eit steg å gå før ein har fått ei verkeleg mangfaldig feleklasse også på Landsfestivalen.

NB! Kven som er finalistar i Trekkspel-klassa som gjekk av stabelen i ettermiddag, var ikkje kunngjort då denne saka vart publisert. Ein kan fylgje med på dette og andre resultat her. Lenke til et annet nettsted, åpnes i nytt vindu.