Meisterkonserten ventar etter sterke tevlingar i lag- og gruppespel

Etter to dagar med lagspel og gruppespel er scena sett for meisterkonserten på Landsfestivalen i gammaldansmusikk i Vågå. Sundag klokka 12 møtest dei fremste laga og gruppene frå innleiande tevlingar for å kjempe om meistertitlane.

Tekst: Redaksjonen

Gruppespelklassa har fått eit etterlengta oppsving i år. Heile 47 grupper stilte til start, den høgaste deltakinga på mange år. Det er eit tal som nærmar seg storheitstida kring 1990, då klassa jamleg samla over 50 grupper. Under rekordfestivalen i Vågå i 1991 deltok heile 64 grupper.

Til meisterkonserten har dommarane peika ut Kjorstad, Odde & Thorud, Kompani Byre og Skrot. Kjorstad, Odde & Thorud består av Svein Ove Brun, Eivind Kjorstad, Mads Erik Odde, Bjarne Odde og Geir Marius Thorud. Kompani Byre har Geir Byre, Thomas Lomundal, Mads Erik Odde, Ola Nesset, Thomas Nilssen og Marius Westling på laget, medan Skrot består av Ane Stakston Aasen, Vegard Hansen, Semon Harerusten, Steinar Odde, Ragna Valde Sletten og Gro Visdal.

Fleire av musikarane har markert seg sterkt gjennom gruppespeltevlinga. Mads Erik Odde er representert i to av dei tre gruppene som skal spele meisterkonsert, medan Bjarne Odde og Ola Nesset begge er med i fleire grupper som hevda seg i toppen av resultatlista.

I lagspel for fele og hardingfele er det Lom Spelmannslag, Mukampen Spelmannslag og Østerdølenes Spellmannslag som har kvalifisert seg til meisterkonserten. Bak desse følgde Sør-Fron Spelmannslag, Gamlebanken Spelemannslag og Vågå spelmannslag.

Kven som kan kalle seg landsmeisterar i lagspel og gruppespel, blir avgjort når meisterkonserten går av stabelen søndag klokka 12.