Klangen før fela 2025: Kurs, konsertar og 20-årsmarkering av Egil Storbekkens Musikkpris

Tekst: Pressemelding/redaksjonen

Arrangementet er eit samarbeid mellom Norsk Kvedarforum, Norsk Langeleikforum, Norsk Lur- og Bukkehornlag, Juoigiid Searvi og Norsk Munnharpeforum, i samarbeid med Riksscenen.

Finn meir informasjon på Riksscenen sine nettsider her.

Kurs og instrumentmakertorg

Kursprogrammet er breitt og rettar seg både mot erfarne og ferske utøvarar. Blant instruktørane finn vi Solfrid Nestegard Gjeldokk og Olaf Moen (kveding), Ingrid Lingaas Fossum, Marit Steinsrud og Gøril Ramo Håve (langeleik), Jim Erik Hoem Johansen, Bernhard Folkestad og Kyrre Matias Goksøyr (munnharpe), Hans Fredrik Jacobsen (seljefløyte), Tone Hulbækmo (harpe), Eilif Gundersen og Bendik Smedåsgjelten Qvam (lur og bukkehorn), samt Karen Anne Buljo og Ola Stinnerbom (joik).

Laurdag blir det òg instrumentmakertorg, der fleire av landets fremste handverkarar stiller ut og demonstrerer instrument: Oddrun Hegge, Sverre Jensen, Sverre Heimdal, Simen Roheim Iversen og Karstein Grønnesby. Barn kan delta på eige instrumentmakerkurs med Kjetil Myhren.

Konsertar og møteplassar

Fredagskvelden startar med minnemarkering for Stein Villa og konsert med kurshaldarane, før Langeland/Apneseth held konsert på hovudscenen.

Laurdag står felles samlingar om joik og eit møte med Einar Selvik (Wardruna) på programmet. Kvelden kulminerer med ein stor festkonsert som markerer 20-årsjubileet til Egil Storbekkens Musikkpris – med medverknad frå mellom andre Eli Storbekken, Tone Hulbækmo, Hans Fredrik Jacobsen, Eilif Gundersen, Bendik Smedåsgjelten Qvam og Einar Selvik.

Søndag rundast helga av med kursoppsummering og konsert med verdskjende Huun-Huur-Tu frå Tuva, kjende for si unike strupesongtradisjon.

Egil Storbekkens Musikkpris 20 år

Årets festival er også ein jubileumsmarkering: Egil Storbekkens Musikkpris blir delt ut for 20. gong. Prisen heidrar minnet etter komponisten, kulturberaren og folkemusikaren Egil Storbekken (1911–2002), som gjorde eit banebrytande arbeid for å løfte fram instrument som lur, bukkehorn, seljefløyte og tussefløyte.

Storbekken sette djupe spor i norsk musikkliv, både som komponist med over 200 verk og som ein av dei viktigaste formidlarane av eldre folkemusikkinstrument i etterkrigstida. Prisen, som vert delt ut i samarbeid med NOPA, Norsk Lur- og Bukkehornlag, Riksscenen og familien Storbekken, er på 25 000 kroner og eit kunstverk. Namnet på årets prisvinnar blir først offentleggjort under festivalen.