Tekst: Redaksjonen.

Valkyrien Allstars med Lyseblått på ljøsblå fele

Valkyrien Allstars er ute med singelen Lyseblått, ei låt bygd på ein valdresspringar etter Ola Bøe. Bandet har latt seg inspirere av den såkalla ljøsblå felestillinga, og legg til eit nyskrive «låttestev» med tematikk frå kjenslelivets skyggesider, som begynner slik:

Har du no' å skjule, spør du

Jeg har no' å skjule, spør du meg

Jeg hjalp deg med å rote på rommet

Jeg hadde deg langt ned i lomma

Det ble tungt å bære, dumme

Det går ann å være -

Var vi aldri nære

Var vi aldri, var vi aldri noen ting

Du vet du sa at jeg var bare din

Bare din

Bare din og en dramme-gin

Dødstille songar frå den jyske heia

På albumet Stemmer i Voks har Ulla Bendixen og Martin Ottosen (Sorten Muld) tonesett fonografopptak frå tidleg 1900-tal. Gjennom varsamt komponerte arrangement for blant anna trøorgel, mandolin og cello møter rå stemmer frå den jyske heia vår tid. Albumet er basert på innsamlingar gjort av Evald Tang Kristensen, og løftar fram gløymde songar om liv, lagnad og lengt.

Nortopia med vestlandsvind

Trioen Nortopia – med Ingrid Sørheim (durspel), Johanne Mjøs (fele/hardingfele) og Kristian Wolski (cittern) – har sleppt singelen Fjellmannjenta, rull etter Anders Kjerland. Trioen er inspirert av vestlandsk slåttemateriale og har utvikla eit lyrisk lydbilete.

Vegar Vårdal feirar 50 år med Alumni

Felespelar og formidlar Vegar Vårdal har runda 50 og feirar seg sjølv med albumet Alumni. Prosjektet, som er omtala tidlegare her på folkemusikk.no, oppsummerer eit rikt musikarliv med røter i tradisjon, pedagogikk og samspel.

Sjekk ut musikken her.

Knuste hjarteslag frå Eir

Singelen Du dro med henne er andre smakebit frå Eir sitt komande album Frydenlundgata. Låta tematiserer sjalusi, flørt og det uoppnåelege – alt pakka inn i eit elektronisk og klubbprega lydbilete. Lanseringa skjer 2. mai under SPOT-festivalen i Århus.