Barnesong står i sentrum for årets kvedarseminar

18.–20. september samlar Norsk Kvedarforum kvedarar og andre songinteresserte til nasjonalt seminar i Trondheim. Temaet i år er den norske barnesongtradisjonen.

Tekst: Pressemelding/redaksjonen.

Norsk Kvedarforum er ein møtestad for kvedarar, både utøvarar og tradisjonsberarar, og skipar årleg til nasjonale seminar med ulike tema innan song- og kvedartradisjonar.

Tidlegare har seminara mellom anna sett søkjelys på ulike geografiske tradisjonar, stev og balladar og diktarar som Petter Dass og Gjest Baardsen. I fjor samla forumet deltakarar i Sandefjord til eit nordisk balladeseminar.

I år går turen til Trondheim, der helga 18.–20. september blir vigd den norske barnesongtradisjonen.

Frå voggesong til songleik

Seminaret tek for seg temaet breitt. Deltakarane skal både lære songar og songleikar og få faglege innblikk i tradisjonen. Det blir òg lagt vekt på formidling til barn og på praktisk arbeid, med ein kombinasjon av foredrag, workshopar og aktiv song gjennom helga.

Fredag kveld opnar Unni Løvlid seminaret. Ho vil fortelje om arbeidet sitt som formidlar og innsamlar, og samtale med Veslemøy Fjerdingstad om opplæring i folkesong for barn – før, no og i framtida.

Laurdag morgon står Lisa Bonnár Stjernø på programmet med foredraget «Bånsull/voggesong – løyndomar og særpreg». Bonnár Stjernø er songar og professor i musikk og har doktorgrad i musikkpsykologi frå Noregs musikkhøgskule, der ho forska på voggesongar og bånsullar. I dag er ho instituttleiar for kunstfag og kulturstudie ved Universitetet i Innlandet.

Pedagog og songar Richard Patey skal vidare sjå på barnesongar med overraskande historier. Repertoaret strekkjer seg mellom anna frå skatteprotestar til kvinnefengsel og skotsk nasjonalisme. Fleire av songane er også kjende i Noreg.

Kurs for barn og workshop med Ruth Wilhelmine Meyer

Laurdag formiddag blir det eit eige tilbod for barn og unge. Under tittelen «Ro te by'n og sæggel te Flakk» skal Jorunn Sterten Melhus halde eit gratis to timar langt kurs i folkesong. Kurset blir avslutta med framføring for dei andre seminardeltakarane.

Ein stor del av laurdagen er elles sett av til arbeid med Ruth Wilhelmine Meyer. Meyer har lang erfaring med formidling til barn og har hatt fleire tusen framsyningar for barn. Ho arbeidde også i fleire år saman med Agnes Buen Garnås med skulekonsertar.

På seminaret vil Meyer både snakke om formidling til barn og leie ein workshop der deltakarane får prøve seg på ulike oppgåver.

Sundag før lunsj blir det arkivdykk med folkesongar, låtskrivar og pedagog Runa Kvalsund. Ho arbeider særleg med materiale frå Trøndelag og Møre og Romsdal og er arkivformidlar i FolkArkiv Trøndelag under Norsk senter for folkemusikk og folkedans.

Gjennom arkivmateriale og praktiske aktivitetar skal deltakarane få ein smakebit av songleiken si historie i Noreg.

«Vi syng med det nebbet vi har»

Det blir også god plass til å synge saman. Både fredag og laurdag kveld blir det kvedarkrok, der deltakarane kan dele songar og tradisjonar frå ulike delar av landet.

– Her er det frimod som gjeld, og vi syng med det nebbet vi har, fortel leiar i Norsk Kvedarforum Olaf Moen.

Laurdag ettermiddag blir det dessutan ei eiga songøkt. I fjor vart denne gjennomført som ei vandring frå rom til rom på hotellet, og arrangøren lovar at deltakarane også i år kan vente seg ei uhøgtideleg og praktisk tilnærming til songen.

Norsk Kvedarforum understrekar at seminaret er ope for alle som er interesserte i temaet. Det er ikkje eit krav å ha mykje kunnskap eller erfaring frå før.

– Likar du å synge, så er du inderleg velkomen!

Norsk Kvedarforum sitt nasjonale seminar blir arrangert i Trondheim 18.–20. september.

Påmelding skjer via LetsReg Lenke til et annet nettsted, åpnes i nytt vindu., eller ved å ta kontakt med Norsk Kvedarforum på kvedarforum@gmail.com.