Tekst: Redaksjonen

Madam Jam – «Lurifox» (singel 3. mai)

Innlandsbandet Madam Jam har på kort tid markert seg med runddansuttrykket sitt. Singelen «Lurifox» er den første av tre låtar som kjem før det nye albumet Partykongen, med planlagt slepp i slutten av mai. Gruppa vann Folkelarmprisen for debutalbumet van danse i 2023.

Gro Marie Svidal – «Rop / Holsen» (dobbeltsingel 15. mai)

Hardingfelespelet til Gro Marie Svidal er denne gongen forma gjennom improvisasjon, som del av hennar doktorgradsarbeid ved Norges musikkhøgskole. «Rop» og «Holsen» er del av det kommande albumet Tryllespel, som blir lansert 4. juli med konsert på Førdefestivalen dagen før.

▶ Høyr «Rop»
 

Anders Lillebo – singlar frå Munnspill (16. og 28. mai)

Multiinstrumentalisten Anders Lillebo løftar fram munnspelet som folkemusikkinstrument i sitt nye prosjekt. Slåttematerialet er henta frå grensetraktene mellom Noreg og Sverige, og har både røter i eldre feleopptak og munnspeltradisjonar frå t.d. Engerdal. Albumet Munnspill kjem 6. juni, med konsert i Engerdal 5. juni.

Levina Storåkern – «Orissa» (singel 9. mai)

Svenske Levina Storåkern er aktuell med singelen «Orissa», andre smakebit frå det kommande soloalbumet Månadsvill som kjem 30. mai. Låta er bygd på dei første sidene av diktverket Orissa (1999) av Ola Julén, og kombinerer song og opplesing i eit poetisk og neddempa uttrykk.

Annlaug Børsheim – «Med sorg og salte tårer» 

Vokalist og musikar Annlaug Børsheim presenterer eit nytt soloprosjekt med bandet sitt, der ein tradisjonell vise frå Åseral står i sentrum. Teksten er skriven av Knut Haugan på 1800-talet etter å ha mista dottera si. Musikalsk ligg låta i skjæringspunktet mellom folkemusikk og mørk, elektrisk rock.

Hekate – «Nordavinden» (singel 16. mai)

Vokaltrioen Hekate slepp i juni sitt debutalbum Evigheten forestår, og gir i mellomtida ut singelen «Nordavinden». Låta kombinerer ein salmetekst av Dorothe Engelbretsdotter frå 1600-talet med ein springleik av Fel-Jakup. Slåttetralling og improvisasjon står sentralt i trioen sitt uttrykk. Albumet kjem 13. juni på Grappa/Heilo.