Tekst: Pressemeldingar/Redaksjonen

Vegar Vårdal – Stev til Kampen

Fredag 22. august slepper Vegar Vårdal tredje singel frå albumet Uventa. Stev til Kampen var det aller første opptaket til prosjektet – ein spontan improvisasjon gjort på Valdres Folkemuseum ein dag han eigentleg var ferdig i studio. Med hardingfele bygd av Ottar Kåsa (lånt frå Dextra Musica), utforskar Vårdal lydar inspirert av lokkerop, vind og bylandskap. Plata Uventa markerer både 50-årsdagen til spelemannen og 30 år som aktiv musikar, og inngår i ein trilogi med prosjekt som granskar folkemusikken i møte med improvisasjon.

Kenneth Lien & Center of the Universe – Fanitullen

Kan hardingfela sin klassikar fungere som klubbmusikk? Det meiner Kenneth Lien og elektronika-veteranen Center of the Universe. 22. august slepper duoen Fanitullen på Heilo – første singel frå albumet Norwegian Electronic Folk Music (19. september). Resultatet er ei mørk og trollsk «banger» der slåtten, lært etter Odd Bakkerud, får nytt liv med hardtslåande rytmikk. Lien er kjend frå Ævestaden og kappleiksscena, medan C.O.U. alias Jørgen Skjulstad har vore pioner innan norsk elektronika i ei årrekke.

Benedicte Maurseth – Simleflokk under månen

Andre smakebit frå albumet Mirra (22. august) er ute no: Simleflokk under månen. Her skildrar Maurseth villreinens vandringar på Hardangervidda i eit poetisk lydlandskap, der hardingfele blandar seg med perkusjon (Håkon Stene), bass og elektronikk (Mats Eilertsen) og tangentar (Morten Qvenild). Maurseth vidarefører tradisjonen frå prisbelønte Hárr (2022), men vender denne gongen blikket mot reinsdyra sin livssyklus og tilpassingar. 

Skurken på dansegolvet – E æ ein vals

Dansegolvfavorittane i Skurken på dansegolvet, Pål Bratås og Steinar Odde, er ute med ny singel: E æ ein vals. Låta er ein forsmak på albumet som kjem 19. september, og held fram bandets kjenneteikn: leikne arrangement og drivande spel med røter i både folkemusikk og andre sjangrar.

Ingrid Lingaas Fossum & Vemund Olav Aukrust – Grimeliden

Duoen Fossum & Aukrust byr på eit uvanleg møte mellom langeleik og kyrkjeorgel i singelen Grimeliden, produsert av Vegar Vårdal. Låta er første utgjeving frå albumet Himmelleite, som blir lansert med konsert på Riksscenen 28. august (digitalt dagen etter). Med denne kombinasjonen utforskar dei både det intime og det storslåtte i folketonar og improvisasjon.

Johanne Flottorp og Anders Hefre ofl. – Mann han reiste at beite skog

Frå det komande albumet Som lindi bere lauv (slipp 5.–6. september med konsertar i Bø og Oslo), kjem singelen med same namn. Låta er «ein liten song om ein mann som har mykje å syssle med», framført av eit sterkt lag: Gravir Klykken på vokal, saman med Åsmund Solberg, Anders Erik Røine, Anders Bitustøyl, Jostein Rørmark, Anders Hefre og Johanne Flottorp. Plata blir gitt ut på Ta:lik records, og varslar ein rik og fargerik produksjon der folketonen møter eit breitt spekter av instrument og uttrykk.

Alle desse seks singlane viser kor breitt og nyskapande norsk folkemusikkfelt er i dag – frå solistisk hardingfele-improvisasjon til elektroniske dansegolvrytmar og eksperiment med instrument som sjeldan møtest.

PS! Johanne Flottorp er tilsett i Folkemusikk, men er ikkje involvert i skriveri om eigne produksjonar.